პოლიტიკა
„ჩვენ მივაღწევთ იმას, რომ ხელისუფლებამ ვეღარ მართოს ქვეყანა, დანიშნოს რიგგარეშე არჩევნები და ჩამოშორდეს ძალაუფლებას“ - გოჩა თევდორაძე
„ჩვენ მივაღწევთ იმას, რომ ხელისუფლებამ ვეღარ მართოს  ქვეყანა, დანიშნოს რიგგარეშე არჩევნები და ჩამოშორდეს ძალაუფლებას“ - გოჩა თევდორაძე

პოლიტიკური ძალა, რომელმაც ლომის წილი შეიტანა ნაციონალური რეჟიმის დამარცხებაში ხელისუფლებას  უპირისპირდება და  გადადგომისკენ მოუწოდებს. „პატრიოტთა ალიანსი“  „ოცნების“ მთავარ შეცდომად კოჰაბიტაციას მიიჩნევს. მათი პოლიტიკურ-ეკონომიკური მოთხოვნები  პროტესტის უკიდურესი ფორმის, შიმშილობის დაწყების მიზეზი ხდება. „პატრიოტები“ ხელისუფლებას საშინაო და საგარეო პოლიტიკასთან დაკავშირებულ ცხრა მოთხოვნას უყენებენ:

1. საქართველოს კონსტიტუციაში მკაფიოდ ჩაიწეროს, რომ ტერიტორიული მთლიანობის აღდგენა სახელმწიფოს უპირველესი ამოცანაა. 2. კონსტიტუციაში ჩაიწეროს, რომ ახალგაზრდა თაობაში ეროვნული ცნობიერებისა და ქართული აზროვნების ჩამოყალიბება სახელმწიფოს უპირველესი ვალდებულებაა. 3. აღდგეს ჩანაწერი,რომლის თანახმადაც კულტურული მემკვიდრეობის დაცვა თითოეული მოქალაქის ვალდებულებაა. 4. სასოფლო-სამეურნეო დანიშნულების მიწის არც მფლობელი და არც დამქირავებელი არ შეიძლება იყოს უცხოელი. 5. გაუქმდეს მაჟორიტარული საარჩევნო სისტემა. 6. შეიქმნას სახელმწიფო კომისია, რომელიც დაიწყებს მუშაობას ახალი პოლიტიკური ფორმატის „საქართველო-ნატო-რუსეთის" ამოქმედებაზე თავდაუსხმელობის, უსაფრთხოების, საზღვრების დაცვის კუთხით და ამავე კონტექსტში დაიწყოს პირდაპირი დიალოგი სოხუმთან, ცხინვალთან და მოსკოვთან. 7.შეიქმნას საბანკო გადასახადების მარეგულირებელი კომისია,რომელიც დაარეგულირებს არა უბრალოდ საბანკო კრედიტის პროცენტის მოცულობას,არამედ ჯამში ყველა საბანკო გადასახადს. წლიურად ეს გადასახადი დოლარში უნდა შეადგენდეს 6%, ხოლო ლარში 9%, იგივე უნდა ეხებოდეს მიკროსაფინანსო ორგანიზაციებს. ეროვნულმა ბანკმა სასწრაფოდ დაიწყოს საბანკო გადასახადების რეგულაცია და პროცენტის შემცირება, იმგვარად რომ მოსახლეობამ თავი დააღწიოს საბანკო ტერორს და მძევლობას. 8. სასწრაფოდ შეიქმნას სახელმწიფო კომისია,რომელიც არა მარტო   განიხილავს თითოეული დაზარალებული იპოთეკარის და მეანაბრის  საქმეს და არამედ ინდივიდუალურად გადაწყვეტს ყოველი კონკრეტული ოჯახის საკითხს ბიუჯეტიდან გამოყოფილი სახსრებით.9. დაიწყოს ხელახალი აღწერა და სოციალური შემწეობა აღუდგეს ყველა იმ მოქალაქეს,რომელსაც ის უსამართლოდ გაუუქმეს,შეიცვალოს ე.წ. კრიტერიუმების, ქულების მინიჭების აბსურდული სისტემა,რომლის საფუძველზეც შემწეობა ერთმევა გაღატაკებულ ფენას.

გაითვალისწინებს თუ არა ხელისუფლება „პატრიოტთა“ ხედვებს?  რა შანსები აქვს გამარჯვებისთვის „პატრიოტთა ალიანსს“?  რამდენად რეალურია ხელისუფლების გადადგომის მოთხოვნა?   როგორ ფიქრობენ ისინი  ქალაქის წინაშე არსებული სოციალურ-ინფრასტრუქტურული პრობლემების გადაჭრას? რატომ ტყუის ხელისუფლება, როცა აცხადებს, რომ ქართული მიწა არ გაიყიდება? ამ და სხვა საშინაო და საგარეო პოლიტიკურ საკითხებზე  Sazogadoeba.ge-ს „პატრიოტთა ალიანსის“ პოლიტიკური მდივანი, თბილისის საკრებულოს დეპუტატობის კანდიდატი გოჩა თედორაძე ესაუბრება:

-ბატონო გოჩა, როგორ შეაფასებდით განვლილ წინასარჩევნო პროცესს, ოპოზიციური პარტიები არახელსაყრელი საარჩევნო გარემოს შექმნაში ადანაშაულებენ ხელისუფლებას, როგორია თქვენი მოსაზრება ამ საკითხთან დაკავშირებით?

-რა თქმა უნდა, წინასაარჩევნო გარემო არის არათანაბარი, არაგამჭვირვალე და არათავისუფალი. ჩვენ ვხედავთ, რომ ერთი პოლიტიკური ძალის დაფინასება 20-ჯერ აღემატება სხვა ყველა დანარჩენი პოლიტიკური ძალის ერთობლივ დაფინანსებას. ამის გარდა, ადგილი აქვს ადმინისტრაციული რესურსის, ბიუჯეტის თანხების უხეშ გამოყენებას, ზეწოლას. ადგილობრივ მუნიციპალიტეტებს არჩევნებამდე ერთი თვით ადრე გაუჩნდათ აზრი, რომ ერთჯერადი სოციალური დახმარება გასცენ, რეალურად ეს ამომრჩევლის მოსყიდვაა. როდესაც პარტიული მაჟორიტარობის და მერობის კანდიდატები იყო დასაყენებელი, მიმდინარეობდა ზეწოლა  და არაერთხელ ვნახეთ, რომ კანდიდატმა მოხსნა კანდიდატურა. თავისთავად,  ასეთი შემთხვევების უმეტესობა  ხელისუფლების ზეწოლის გამო იყო.

რაც შეეხება, მედიაგარემოს, რუსთავი 2-მა მაგალითად, პირდაპირ გამოაცხადა, რომ „პატრიოტთა ალიანსს“ ეთერში არ მიიწვევდა.  ტელეკომპანია „იმედი“ პირდაპირ ხელისუფლების დაკვეთას ასრულებს და აშკარად ჩანს, რომ აქ ოპოზიციური სპექტრი ძალზე სუსტად არის წარმოდგენილი. ამას თუ თავისუფალ სივრცეს და დამოუკიდებელ მედიას ვარქმევთ, არ ვიცი...

-როგორ ფიქრობს თქვენი გუნდი ქალაქის წინაშე არსებული სოციალური და ინფრასტრუქტურული პრობლემების გადაჭრას? რა იქნება თქვენთვის პრიორიტეტი?

- ჩვენს პროგრამაში ყველაფერი გაწერილია, ტელეეთერებში, სადაც კი საშუალება მოგვეცა ვცადეთ, რომ პრიორიტეტები წარმოგვეჩინა. ეს არის მცირე და საშუალო ბიზნესთან დაკავშირებული საკითხები, როგორ უნდა გათავისუფლდეს ის ზედმეტი გადასახადებისგან. წარვადგინეთ ბიზნესის დაწყების პროექტი, ასევე ქალაქის საცობებისგან გათავისუფლების, ბინათმშენებლობებთან,  ამორტიზირებულ კორპუსებთან, ქალაქის ურბანულ განვითარებასთან დაკავშირებული ჩვენეული ხედვა. ჩვენი წარმომადგენლები პარლამენტის წინ  სოციალურ-პოლიტიკურ პრობლემატიკასათან დაკავშირებით დღესაც პროტესტის უკიდურეს ფორმას მიმართავენ.  ვამბობთ, რომ სოციალური შემწეობის მინიჭების კრიტერიუმები უნდა გადაიხედოს და შემწეობა აღუდგეს ყველას, ვისთვისაც ეს სასიცოცხლოდ მნიშვნელოვანია. ჩვენ ვსაუბრობთ პარკირების პრობლემებთან დაკავშირებით, თუ როგორ უნდა მოხდეს ქალაქის საცობებიდან განტვირთვა, ეკოლოგიური პრობლემების გადაჭრა, რაც ძალზედ მნიშვნელოვანია.

-გამარჯვების რა შანსები აქვს თქვენს პარტიას საპარლამენტო არჩევნების შედეგების გათვალისწინებით და ელით თუ არა მეორე ტურს თბილისის მერის არჩევნებში?

-თუ ხელისუფლება ტოტალურ გაყალბებას არ მიმართავს, ისე როგორც წინა არჩევნების დროს, ჩვენი გვყავს ის კანდიდატი, რომელიც თავისთავად ცხადია, მაღალ შედეგს მიაღწევს. მე არა მაქვს იმის ილუზია, რომ თბილისის არჩევნების ბედი პირველ ტურში გადაწყდება, საჭირო იქნება ალბათ მეორე ტური, სადაც ჩვენს ლიდერს, ირმა ინაშვილს მოხვედრის რეალური შანსი გვაქვს.

-„პატრიოტთა ალიანსს“ მთავარ ბრალდებად  ივანიშვილის სატელიტობას უყენებენ.  რას იტყვით ამის შესახებ?

-„პატრიოტთა ალიანსი“ ერთადერთი პოლიტიკური ძალაა დღეს, რომელიც რეალურად აკრიტიკებს „ქართულ ოცნებას“ სოციალურ სფეროსთან, საგარეო კურსთან, ეკონომიკურ პრობლემატიკასთან დაკავშირებით. ჩავატარეთ  რამდენიმე მასშტაბური საპროტესტო აქცია, მივმართავთ პროტესტის უკიდურეს ფორმას, შიმშილობას. ერთადერთი პოლიტიკური ძალა ვართ, რომელიც ხელისუფლების გადადგომას ითხოვს და ეს არის სატელიტობა?  ასე რომ, ვისაც რისი დანახვა უნდა, იმას ხედავს.

-რამდენად რეალურია ხელისუფლების გადადგომის მოთხოვნა?

-ეს რაელური იქნება, თუ „ოცნება“ გონს არ მოეგება და ეკონომიკური და საგარეო მიმართულებით  ქმედით ნაბიჯებს არ გადადგამს. წლების წინ არავის ეგონა, რომ „ნაციონალური მოძრაობა“ დაასრულებდა ძალაუფლებაში ყოფნას, მაგრამ აღმოჩნდა ისე, რომ დაასრულა. ანალოგიური დაემართება ამ ხელისუფლებასაც, ისე გაოგნებული დარჩება თვითონ, როგორც ახლა ჰყავს გაოგნებული ვენეციის კომისია და ქართული საზოგადოება იმ უზურპატორული ნაბიჯებით, რასაც დგამს თვითონ.

„ქართული ოცნება“  სრულად დაემსგავსა „ნაციონალურ მოძრაობას“. მას პოლიტიკურ სივრცეში არ სურს ვინმე იხილოს, გარდა „ნაციონალური მოძრაობისა“ , რათა „მოღვაწეობის“ ცხრა წელი შეახსენოს, ამიტომ მათთან საუბარი ადვილია. ჩვენ ვხედავთ, რომ ერთპარტიულ რეჟიმში მიიღო კონსტიტუცია და დღეს პარლამენტის თავმჯდომარე განცხადებას აკეთებს, რომ თურმე ქვეყნის უზენაესი კანონის მიღების დროს კონსენსუსი კი არ ყოფილა მთავარი, არამედ ხარისხობრივი მაჩვენებელი. ეს კონსტიტუცია თურმე ხარისხიანია, რადგან იძლევა იმის საშუალებას, რომ ერთმა ძალამ მანდატების მიტაცების გზით, ხელისუფლება მარადიულად შეინარჩუნოს.

 ხელისუფლება ქვეყნის მთავარ პრიორიტეტად არ სახავს ტერიტორიული მთლიანობის აღდგენას, არ სურს სიღარიბე დაძლიოს.  გაღატაკებულია საქართველოს მოსახლეობის უდიდესი ნაწილი და ამ კუთხით არაფერი არ კეთდება, გარდა იმისა, რომ წინასაარჩევნოდ ვიღაცეებს შემწეობა აღუდგება. არჩევნების დასრულების შემდეგ კი ამ ადამიანებისთვის მასობრივად  ხდება მატერიალური შემწეობის წართმევა. საქართველოს მოსახლეობას ლარის შოკისმომგვრელი ინფლაცია დაატყდა თავს  და ხელისუფლებას არ უნდა რამე   შეისმინოს. ჩვენი ცხრა მოთხოვნა სრულად ასახავს ქვეყანაში შექმნილ მდგომარეობას.  

-ხელისუფლება ამბობს, რომ მიწას არ ყიდის. მართალია კონსტიტუციაში წერია, რომ მიწა უცხო ქვეყნის მოქალაქეებზე არ გაიყიდება, მაგრამ გამონაკლის შემთხვევებს ორგანული კანონი არეგულირებს. თქვენ ფიქრობთ, რომ ხელისუფლება იტყუება და ორგანული კანონის სახით ხვრელი დატოვა კანონმდებლობაში?

-რა თქმა უნდა, ხელისუფლებას მოსახლეობა  შეცდომაში შეჰყავს, რადგან ასეთი გამონაკლისი ასში შეიძლება ოთხმოცდაცხრამეტი იყოს. ამას ადგენს ხელისუფლების რომელიმე წარმომადგენელი იმის მიხედვით, ესა თუ ის ინვესტიცია რამდენად მიზნობრივად მიაჩნია. არადა რეალურად, ყველა განვითარებული სახელმწიფოსთვის სოფლის მეურნეობის სფერო არის დოტაციური და სოფლიის მეურნეობაში შესული ინვესტიცია არცერთი ქვეყნისთვის, არასდროს ეკონომიკური ზრდის განმსაზღვრელი არ გამხდარა. მარტივი მაგალითის მოყვანა შეიძლება,Samsung-ის ან Apple-ის წლიური საქონელბრუნვა მსოფლიოს ყველა განვითარებული ქვეყნის ბრუნვაზე მეტია სოფლის მეურნეობის კუთხით. ამ კუთხით განხორციელებული ინვესტიციები ძალზე მიზერულია. ამ მიმართულებით ქვეყანაში დიდი ინვესტიციები არც შემოდის და არც შემოვა. ერთადერთი რაც მოხდება, ქვეყანა დაკარგავს მიწებს.

მიწის საკითხი ცხრა მოთხოვნიდან ერთ-ერთია,  ვხედავთ, რომ ხელისუფლების რეაქცია ამ კუთხით ნულოვანია, მათ  არ ესმით ხალხის პროტესტის. ჩვენ მივაღწევთ იმას, რომ ხელისუფლებამ ვეღარ მართოს  ქვეყანა, დანიშნოს რიგგარეშე არჩევნები და ჩამოშორდეს ძალაუფლებას.

ხელისუფლებისთვის ადვილია ოპონირების რეჟიმში ჰყავდეს ნაც. მოძრაობა და მისი განაყოფები, ესენი ჩემთვის და ხალხისთვის ერთი ძალაა, მათ ერთი ფესვი და ერთი ტოტი აქვთ. ხელისუფლება თვითონ აცოცხლებს მათ.  2012 წლის პარლამენტს  რომ იმ ცხრა წლიანი მმართველობისთვის პოლიტიკური შეფასება მიეცა და რეჟიმად გამოცხადებულიყო, დღეს ვერც ნაც. მოძრაობას და ვერც მის განშტოებებს პოლიტიკაში ვერ ვნახავდით. 

-რუსეთში „პატრიოტთა ალიანსის“ ვიზიტმა რაში დაგარწმუნათ, არსებობს რუსულ-ქართული ურთიერთობების გაჯანსაღების და საქართველოს ტერიტორიული პრობლემების მოგვარების თუნდაც მცირედი შანსი?

-დიახ, შანსი არსებობს და რეალურად ეს შანსი არის დღეს და შეუძლებელია  იყოს ათწლეულების შემდეგ. ეს იმედი იმ დრომდე არსებობს, ვიდრე ის თაობაა ცოცხალი, რომელიც აფხაზეთიდან და ცხინვალიდან გამოიდევნა. ყოველი დღე გვაშორებს ჩვენ აფხაზეთსა და ცხინვალს. ამიტომ ამ კუთხით სასწრაფოდ ქმედითი ნაბიჯებია გადასდგმელი. გალის რაიონში სახელმძღვანელოების შეტანა, ჰუმანიტარული აქციებიც ძალიან მნიშვნელივანია. ჰუმანიტარული აქციების განხორციელების დროს აფხაზსა და ქართველს, ოსსა და ქართველს შორის კავშირების აღდგენა ხდება. ადამიანური ურთიერთობების აღდგენით ბევრი რამ იწყება.

ამავე დროს თუ იარსებებს ისეთი ფორმატი, როგორიც არის ნატო-საქართველო-რუსეთი, სადაც ნატოსა და საქართველოსგან რუსეთი  მიიღებს  იმის გარანტიას, რომ საქართველოს ნატოში ინტეგრაციის შემთხვევაში საქართველოს ტერიტორია არ იქნება გამოყენებული რუსეთზე თავდასხმისთვის, პროცესები შეიძლება პოზიტიურად განვითარდეს. ოღონდ ამას ხელისუფლების დაინტერესება  და ტერიტორიული მთლიანობის საკითხის პრიორიტეტად ქცევა სჭირდება. წინააღმდეგ შემთხვევაში, ოცმა ოპოზიციურმა ძალამაც რომ მოითხოვის ნატო-საქართველო-რუსეთის ფორმატის შექმნა, ცხადია, არ შედგება. თუ ხელისუფლებას ტერიტორიული მთლიანობის პრობლემის მოგვარება არ სურს, ეს საკითხი  ვერც დაიძვრება.

-საქართველო-ნატო-რუსეთი-ს ფორმატს რაც შეეხება, თვითონ ნატოს წარმომადგენელმა სამხრეთ კავკასიაში ჯეიმს აპატურაიმ „გაუგებარი“ უწოდა. ხომ არ ფიქრობთ, რომ ეს  სტრატეგია არარეალურია?

-ეს ინიციატივა საინტერესო რომ გახდეს, ნატოს მხარესაც მუშაობა უნდა. გვეუბნებიან, რომ რუსეთთან პირდაპირი დიალოგი არ შეიძლება.  აბაშიძე-კარასინის ფორმატში საუბარია ეკონომიკურ თემებზე, კულტურაზე. ე.ი. რუსეთთან პირდაპირ რეჟიმში ჩვენ შეიძლება ვისაუბროთ ყველფერზე, ეკონომიკაზე, კულტურაზე, მაგრამ არა ტერიტორიულ მთლიანობის აღდგენაზე. ასეთი საოცრება თუ გინახავთ? რეალობა ისაა, რომ დიალოგი უნდა გაგრძელდეს და ამ დიალოგში ხელისუფლება უნდა იყოს ჩართული. ხელისუფლებამ პრიორიტეტად უნდა დაისახოს ქვეყნის ტერიტორიული მთლიანობის აღდგენა, ჩვენ სწორედ ამას ვითხოვთ, რომ კონსტიტუცია განსაზღვრავდეს ქართული სახელმწიფოს უმთავრეს მიზანს-ტერიტორიული მთლიანობის აღდგენას. ამ მიზნის მიღწევის გზაზე გვჭირდება ჩვენ ნატოსა და ევროსტრუქტურებში ინტეგრაციაც.

-ნატოს, რუსეთის და საქართველოს ერთ ფორმატში განხილვა როგორ  უნდა მოხდეს, როდესაც ნატო და რუსეთი ცეცხლი და წყალივით არიან ერთმანეთთან...

-დიახ, მაგრამ საუბრობენ ერთმანეთში, ნატოსა და რუსეთს შორის მიმდინარეობს დიალოგი ძალზე ბევრ საკითხთან დაკავშირებით. რა ვქნათ, ჩავიქნიოთ ხელი? ხომ ყველამ ვიცით, რომ ჩვენ ომით ტერიტორიების დაბრუნება არ შეგვიძლია. მშვიდობიანი გზა კი დიალოგია, რომელიც აფხაზთან, ოსთან და რუსთან უნდა გვქონდეს, დამატებით გეტყვით კიდევ, რომ სომხებთან, რადგან აფხაზეთის მოსახლეობის საკმაო ნაწილს უკვე სომხები შეადგენენ. თავისთავად ცხადია, ახალი მოთამაშეც გამოჩნდა.

-ისევ არჩევნებს რომ დავუბრუნდეთ, რამდენად მისაღებია თქვენთვის, რომ ასეთი კონსერვატორული ქვეყნის დედაქალაქის საკრებულოში  "რესპუბლიკელების" მიერ ლესბოსელი კანდიდატია წარმოდგენილი და ეს მაშინ, როდესაც დასავლეთში ფსევდოლიბერალური ფასეულობების გადახედვა უკვე დაიწყო?

-მე არ ვფიქრობ, რომ ვინმე შევიწროებული უნდა იყოს და არჩევნებში მონაწილეობის უფლება არ ჰქონდეს, მაგრამ ღმერთმა ნუ ქნას, საქართველოში როდესმე ისეთი დრო დადგეს, რომ რაიმე ხელშესახებ წარმატებას მიაღწიოს ასეთმა პოლიტიკურმა ძალამ ან ასეთი პოლიტიკური ძალისგან დაყენებულმა კანდიდატმა.

loading...